პაპავაში მარგალური ლექსეფი
.......................................................................................
სურათი გვალაშე
ჟი ცაშე გინაჯინე მთელ ქიანას ბჟა,
ამარიადო აშმოდინუნა ამდღარი დღა,
გვალაში წვანდემს მიკმაფორუ ობარჩხალაია ბჟა,
ნახანტეფით მოხანტელე ცაში ტრიაპკა.
თოლონჭაფუს სარკალანსუ ბჟაში სხივეფით ზღვა,
ენატყვაცა სხივეფითუ იხანტუ ცა,
მუშ მაშორას ითებუნა ცა დო ზღვა,
ჟირპიჯა კუნთხუ დო ჟიშე გვალა.
ონჯუას თე სურათი აშმოდინუნა თაურე,
ბჟაში მანგიორო განკორჩქინდუ ორწკინაია მთვარე,
მურიცხეფით გეგნიჭკადუ ცაში ჟიდონი მხარე,
თუთაში სინთეთ სარკალანს იშენი ზღვაში მხარე.
ღორონთიში გორჩქინელი ჩქ მიღუნა სერ დო დღაში,
ობარჩხალაია ბჟა დო თუთა თის ანათენს ამდღა თაში,
რზენ დო გვალას გილერულე დიოდღარო ჩქუნი რაში,
ჩქინი ირფელი ჩქინი ქორდასუნი, ჩქ ვამკონა მუთუნი შხვაში.
ემზარ პაპავა
ლუგელა
თარზენი დო ოცინდალე,
შქას მოჩქ ლუგელა,
არძა ართო ჩქინი რე დო
შხვეფი მუშენი დუდენა?!
ლუგელას ირფელი რე
მუთ კოჩის ოკონი:
თხომულონი დო ჭუბურონი,
წიფურონი დო ნუზუონი,
მუზმა გოკონი შხვადოშხვანერი
წყარეფი დო ქუალონი,
ბოლოს დუდო გვალას უღუ
გოტუტულელი შუშელიში ფონი.
ჩქინი ტყასუ ირფელი სორგუ:
ტურა, მელა, თუნთეფი,
ციყვეფი დო ქოთომეფი,
გერეფი დო ერცქემეფი,
ჭუბურიში ნაგვანეფი
გომპულასკირი ტყარი ღეჯეფი,
კირდე-კირდეში გილმაულარი
ქაგიროჩილი დიდ ჯიხვეფი.
კანკალეშა მუკოლენდუნს
ფოცხვერი დო ირემეფი,
მუშენი და ჩქინი გვალა რე
კავკასიაში ნაწილეფი.
ემზარ პაპავა
ტობავარჩხილი
ოსარკალაია ტობავარჩხილს
ცაშიკიბული მუნარე,
ცაში ონჭაფუ კირდეემსუ
უქვინჯე წყარი მულარე.
კირდეეფშე გინნალეფ წყარი
ტობავარჩხილს მუშარე,
თეჯგუა წკონდა ნაძინ წყარიში
კინე თექ გიშალ რე.
ტობავარჩხილს ჯიშტი ვათხიუ,
მარა დოლო სტუმარი რე,
ჯიშტი, დოლო დო ტობავარჩხილი
კირდეეფწკუმა სურათი რე.
ტობავარჩხილიში მაძირაფუ
თე სისკვამეში სტუმარი რე,
თეში მასკვამა ოძირაფუ
ტობავარჩხილწკუმარე.
თექიანი სისკვამეწკუმა
ჩქიმი სიტყვეფი მუთარე,
თექ პირდაპირ ნაძირეფუ
ზღაპარი დო მუდარე.
ემზარ პაპავა
მეტი მურე მუხურსუ
ჩქინი ხობწყარი ჭიჭე რე მარა
ნაჭვიმერს მოძინა უჩქუ,
ართუცბას დეკვირებუქუნი
ინგირო მოგოთონუანც დუცუ.
მინ დიხას მარჩხა რე დო
ვითომ წყარი გვარგვალანს ფუნცუ,
ქვინჯის გერონწკილი ქუალეფი
დუგაკოროცხე ჩქინ მუხურსუ.
ამარი-ემერი კოტოცალო
ჩქინ ხობწყარს გეტომბა უღუ,
კანკალე ქვერსემიასუ
ჟირი-სუმი საჟენი ტომბა უღუ.
დუმუნუაფუ მაჭვიმერო,
გოტყვაცუ დო გოგურგინუ,
თქირშინითუ მოლართ ჭვიმაქ,
ცაში ნოტეხი გეგმარგინუ.
ათეჯგუა ჭვიმა დღასუ
ხობწყარიში წყარი ლანდღვე მურცუ,
ტორგო-ტორგო კალმახეფი
ხობწყარიში დუდშა მესოფუნცუ.
ხობწყარი ფუნცუ გვარგვალანსუ,
კალაპოტის გინმოხორცქუ,
გვალაში მუკნახარცქა ირფელი
ჯადოქუა გიმე მურცუ.
გვალაში გინნაულა წყარი
პირველო მუხურშა მუშურცუ,
მუხურს დარზენებული წყარი
იშენი თეში მესოფუნცუ.
ათეჯგუა ხანგა წყარი
ნაცხაში ხინჯის გუთმურცუ,
კანკალეშა ვენტირე დო
ჟიდო-ჟიდო გინმურცუ.
ჯადოქუა თის არაგუ
ვანკარღვანსუ მუთუნცუ,
ხინჯი ვარი ფარსაგი ოფე
ირფელს ართო გუთმურძუ.
ჯგირი ამინდის თეჯგუა წყარი
წკონდა გუშმურცუ მუხურსუ,
განჩურე დო თექუ გაშვე
ვეგერცილებ მუთუნცუ.
წყარი ვარი წამალი რე
ჟიშე მენჯი ინმურცუ,
ხვალე ეშ გურშენი ვაუძახუნა
კურორტისუ მუხურსუ...
მიდგას გოინტერესუნანი
ვაუჯინათუ მუთუნცუ,
მოზოჯით დო ქუგეგენთუ
მეტი მურე მუხურსუ.
ემზარ პაპავა
მარგალეფი დო აფხაზეფი
ვავა, მუჭო აკარღვესუ
ჩქინი ჭიჭე აფხაზეთი,
აფხაზეთის ამდღა ვარე
ჯინჯო ჯვეში მარგალეფი.
მითინს ვაკო მუთუნიშო
ათეჯგუა აფხაზეთი,
მა ვამიჩქუ მის ონწყუნსუ
აკორღვაფილი აფხაზეთი.
აფხაზეფი დო მარგალეფი!
ვემუოდინუათ აფხაზეთი!
აფხაზემქ დო მარგალემქუ
დობგორათუ შხვა ხაზეფი,
ოდო კინე გევონწყუათ
ჩქინობურა აფხაზეთი.
მარგალეფი დო აფხაზეფი
ართო ვორდით მანგარეფი,
ჩქ ვორდითუ ჯვეშ კოლხეფი,
აფხაზეფი დო მარგალეფი.
ემზარ პაპავა
ირფელი ორწკინაია ეფი
მუზმა ხანირე ვაკეთებე
შურო ჯგირი მუთუნი,
ჩქინიჯგუა ჯვეშ კათაშო
თქვანი მულაში უკული.
ანწი ვარა მარაგადე
ჩქ ვამკონა თქვანი მუთუნი,
ჩქ მუთუ მოკონანი თინა
ირფელი იუაფუ თქვანი უკული.
ჩქინჯგუა კათას მუშენ ბლურა,
მუშენი დუდი მემიძუნა,
გობკურცხათ დო გიბჯინათუ,
მუ დღაშარე მომრთუმუნა:
თუთა ვაჩქუ სოლეთინი,
ვართი მოჩქუ მურიცხეფი,
უკუმელა გერე სერი,
მარა იუაფუ დღაში ეფი.
თუთა დუცუ გელაჭოფუანცუ,
გობარჩხალანს ბჟაცალო,
უკუმელა რუმე სერს
გინართინუანც დღაცალო.
ოჭმარეს გაკლარწკინუც
ობარჩხალაია ბჟაში სხივეფი,
ოდო არძას მაღვენუნა
ირფელი ორწკინაია ეფი.
ოღონს ჩქ ქიდიფქანცუათუ,
ხე გაგმიბღათ მანგარო,
ჩქინი ოკეთებელი საქმეეფი
ჩქ ვაკეთათ მართალო.
მიქ კოროცხუ ზღვას ქვიშა,
ვარდა ცას მურიცხეფი,
ჩქინი ოკეთებელს ვაკეთენსუ
ამერიკა დო რუმინეთი.
ემზარ პაპავა
ლაზონაში მაფშალიეფი
ლაზონაში მაფშალიეფი
მირშვინუნთო შკვითინერო:
ხოფა, რიზე, ტრაპზონი, სამსუნი,...
მარჩქილენა არძანერო.
ლაზიკა, ლაზონი დო ლაზეთი
ირფელი ფშუნა არძანერო,
დიოდღარო ჯვეშ კოლხეფი
არძა ვორეთ ართინერო.
ემზარ პაპავა
გაგრა დო ბიჭვინთა (პიტიუნტი)
ბიჭვინთა, ბიჭვინთა,
გაგრა დო ბიჭვინთა,
მინჯეში ცოდა გეშქოოთანა,
მის უღუ ამდღა მიშ დიხა?!
დღას ვარდ თექიანი მინჯე
ჩქინი მეტი მითინი შხვა,
ქიანაქ ართო დინწყვასუნი
იშენი ჩქინი იუაფუ ჩქინ დიხა.
ბიჭვინთა, ბიჭვინთა,
გაგრა დო ბიჭვინთა,
ჩქინდა მითინც ვენდაღინე,
ჩქინ ყუდე დო ჩქინ დიხა,
ბიჭვინთა, ბიჭვინთა,
გაგრა დო ბიჭვინთა.
თავისუფლება ჩქინ დიხას!
თავისუფლება ჩქინ დიხას!
გაგრა დო ბიჭვინთას!
გაგრა დო ბიჭვინთას!
ემზარ პაპავა
გინალასალი ზღვადოგვალა
კვარჩხიშე ზღვა დო მორძგვიშე გვალა,
შკას რზენი დო რკინაში შარა,
ინგირი დო ფსოუ შკას
ირო მარდ ხალხის ჭარა.
სტუმარეფიშო ირო ფართორდ
დიხა, ზღვა დო ცაში შარა,
მენძელი დო სტუმარემსუ
ართო ორგუდ ზღვა დო ჰავა.
სოთინი ვარდ თეში მასკვამა
გინალასალი ზღვა დო გვალა,
ირკოჩიშო სამოთხერდუ,
გიჩქუდანი ანწი ვარა.
ემზარ პაპავა
ჩქინ ქიანაში მამანგარა
ჩქინ ქიანა დო კათასუ
მუსხანირე ტყაბარანა,
უტყაბარუ ვადიტესუ
უჩა ხოჭო-ტარაკანა.
ჩქინ ქიანასუ მანგარემს
უცენა დო ჭაბაკანა,
უკული მიდგა მუკორჩქინდუნი
თის ხოლო საბაკანა.
ირფელს ართო ღაფუნა დო
ასვალიტის ტაბაკანა,
მთავარი საქმე ვაკეთეს დო
ამდღა ბრელს რაგადანა.
ჩქინ კათაში გიშნაგორაქ
ბრელშა იუ ბოროქ ვარა,
სო იუაფუდ თე ქიანასუ
ჩქინ ქიანაში მამანგარა.
ემზარ პაპავა
მუ მორწონა ამდღარი დღაში?!
მარგალემს მუქ გაღოლეს?!
მუქ გინორლასეს გვალო თაში?!
მა მუთუნქუ ვაგმაგინუ,
მუ მორწონა ამდღარი დღაში?
კონცერტეფიში ჯინაში გურშენი
მუშენი მეუგითუ მიშას ტაში?
ამდღარი დღაშე ვაგაღვენუნა
ვართი ქვირი დო ვართი ქაში.
ემზარ პაპავა
მედაჩხირე მტერი
დიოდღარო საქორთუო შხვადოშხვაში რენია,
ჩქინ ჭიჭე ქიანასუ მტერეფი ნოვე ბრელია,
ამდღარდღასუ საქორთუოს სუმი პრეზიდენტი რენია,
ბჟაეიოლი დო ბჟადალი ვარე ართნერი ფერია.
აფსუემს დო ოსემსუ მუში ვაუღუდუ კერია,
მუშუაშქვით დო ამდღა რენა მედაჩხირე მტერია,
შხვას ვარძენთ დო ჩქ ვამღუნა, ვირიში უკლაში დენია,
შხვაში მიოჩამალი ჩქ ვამღუნა დიხა მუთუნნერია.
თაქ მუთუნი ქოძუნი, ირფელი ხალხიში რენია,
ღორონთიში მუნაჩემუ, მუთუნი ვარე ბრელია,
ბრელი მუდგარენი ბრელი ქორედა, ნება თიში რენია,
თიში უმშო დო ხალხიში უმშო მუთუნი ვემიჩენია.
თინეფიში უკითხირუო ხე ვემითხენია,
ჩქინ ქიანას ვაკონი ფერი მტერეფი ნოვე ბრელია,
საქორთუოში ჯიკვაფი მიში ნება რენია,
მიდგას თენა ვარჯერსუნი, მოღალატე რენია.
ემზარ პაპავა
ნოწკერია
ჩქინ კათაში მიმაჯინეს
მანგარი გური ნოღვენია,
ჩქინ ტყა შხვას მეუღუ დო
ჩქ ვამღუნა ნოწკერია.
ჩქინ ქიანაში ქონება
ირფელი ჩქინი ოფენია,
მარა ჩქ ეს ქომჩანანო
მიშა დო ბოკერია.
ვაუჩერეფი დო ართიშა ქვირი
დროში ოღალალი ოფენია,
აბა სიღარიბეში წამალი
დიო ჩქინო სორენია.
ემზარ პაპავა
სამარგალო ქიანარე (მხედრიონს)
ირკოც ართო გიჩქუდანუ
მინი რე დო მინი ვარე,
ქიგეგით დო დეჯერით
სამარგალო ქიანარე.
ვარჯერადა ქიგეგით
მინ რე დო მინ ვარენი,
მუშ დიხა დო კოჩითუ
სამარგალო ქიანარენი.
სამარგალოს დუდი განებით,
ვანნაკათათ ყუდეშა,
ირო ვაგაპატიენთუ
განგათხოზუთუ ღურეშა.
ჩქინ მტერემს ხომ ქოიჩქუნა
მარგალი კათაში კოჩანა,
თქვან ნაკლები ვამიჩქუნა
ტყვიაში პირდაპირ ოთამა.
მარა თქვა ენა ვარჯერა დო
მისოფუთუ აშო,
გიჩქუდანუ მიტახუნთუ
ხედოკუჩხის ართო.
უკული ხომ ქიდენარღუანთ
ჯვეშ დო ახალს ართო,
ორაგადე გაიენა
მეგრელები ხართო.
ონჯღორე ვაგიჩქუნანო
მუს მოსოფუნთუ აშო,
ვაგარჩქილენანო, მიტახუნთუ
ხედოკუჩხის ართო.
ემზარ პაპავა
ბჟა დო თუთა
თუთაქ დუდი გელაჭოფუ,
გობარჩხალუ ბჟაცალო,
უკუმელა რუმე სერი
გინართინუ დღაცალო.
ემზარ პაპავა
ღარიბეფი
ღარიბეფი თოლს ვარწყეთო,
ვემეხვადითო მუთუნცუ,
თქვა ირო შუნდით დო შუნთუ
კარკაზელი თუთუმსუ.
თქვა მუშენთ დო შხვას მეუღუ,
ვამოირჩქილუანა წუწუნსუ,
ტყაბარელო ქუდორდვანა
ჩქინი ჭიჭე მუხურსუ.
ანწი ვარა ქიგეგითუ,
ნუმ კარკაზანთ თუთუმსუ,
თქვანი ადგილსუ მა ვორდენი
ინეფიშო ვემუბშე მუთუნცუ.
ათე ქიანაში სიმდიდრე
ირფელირე თქვანი,
ოღონს ნორმალურო ქირგებეთ
ჯგირი დო სკვამი.
ემზარ პაპავა
მოზოჯითუ
კერიას დაჩხირი გერგენჩანსუ,
კოტოს ლებია გვარგვალანსუ,
ლანჭას ღუმუ მუკობუ დო
ჩვანსუ ინოტყვარცალანსუ.
ათეჯგუა ღუმუობასუ
ღუმუ უჯინე მიშაზალასუ,
ჯვეშობურო ქოფთქუათუნი
შემლებუნა ბთქუათუ კირზალასუ.
ღუმუ ჩვანს ინოშირშინუნსუ დო
ჩვანი გიდვანსუ ნახვაწასუ,
თეშ უკული საჭირო იუაფუ
კირზა დო ჩოგანი მალასუ.
კოტოთ ლებიაქ დიხაშუ დო
ის ზადუნა მალ-მალასუ.
თენა ოკო უწორუე
ბოლოს ღუმუში დოგაფასუ.
ტაბაკი გილარონწკილი რე,
ადეცაში ღვინი გილაშვარშვალანცუ,
მჟავე დო ლებია თექ ოხოლუ,
ღუმუ ყვალით გილაშვანთალანსუ.
მუს უჯინეთ, ხეწყარი მიბღათ,
მინობზოჯათ მალ-მალასუ,
ვარა ღუმუქ გომირგიდეს,
ღვინქ გოტიბუ ეზმახანსუ.
ემზარ პაპავა
ჯიხვიში გიროჩილი ყანწი
ხულიში ჯინჯი მაფუ ნაძირეფუ
ლაგვანს ინონწკარილი,
ჩქიმი დიდაში ნაკეთებუ
ჭკირილი ნეძამი ზადილი.
ნორცხვა დაჩხირიში ელნადგუმა
კოტოში ლებია ზადილი,
ჩვანიში ნაკეთებუ ღუმუ
ყვალით მიშაშვანთილი.
ელარჯი დო ჭვიშთარითუ
ტაბაკი გილადაცილი,
ხოჯი დო ოჩიში ხორცი
ართო გომპულასკილი,
დუღა-დუღა ხაჭაპური
ყვალით გოთვითვინაფილი,
ჯიხვიში გიროჩილი ყანწი
ღვინითუ გოხვიხვინაფილი,
მუჭორე ინმოძიცანსუნი
ღორონთიში ხვამილი.
ემზარ პაპავა
|
